طاح الحطب والحياة حلوه

بسم الله الرحمن الرحيم

تحياتي للجميع

مشـاهد واقعـية .. !

المشهد الأول
وحدة مزيونة بالحيل و حبيبة
بس تخون !!
وش أسوي بجمالها ؟!
بيآخذها الزمان و تبقى عجوز ~

عادي طاح الحطب والحياة حلوه ~

المشهد الثاني
ملتزم
يصلي كل الفروض ،
و إذا تعب ، فوت صلاة الفجر
وإذا شبع راحت صلاة العصر ~
و عنده دش ويكذب كثير
و إذا صحى الصبح ، مشط اللحية

عادي طاح الحطب والحياة حلوه ~

المشهد الثالث
غني و ظالم ،
يطرد المساكين و يستغل الضعوف
مغرور و فاسق ،
و مجلسه عامر
كلٍ يبهر له ~
و مع ذلك يجمع حسنات من كثر اللي يسبونه

عادي طاح الحطب والحياة حلوه ~

المشهد الرابع
كد يدرس و يشتغل ..
لأجل يبني مستقبله ~
تزوج و جاب عيال ، ثم تقاعد
صار يسكن في مكان ، و أم عياله في مكان
والسبب العيال
صار دار المسنين بيتهم

عادي طاح الحطب والحياة حلوه ~

المشهد الخامس
تغازل و تاخذ أرقام ..
و تطلع مع هذا ، و تواعد هذاك ~
و يوم طاح الفاس في الراس
بكت ..
و راحت تشكي لأمها غدر الزمان ~
طبطبت عليها أمها وقالت :
ولا يهمك سفرة لمصر ، وشوية سيولة
و ترجعين بنت ..

عادي طاح الحطب والحياة حلوه ~

المشهد السادس
مرفوع الكفن أبيض ،
وصاحبه وسط البياض
بعضهم يبكي .. وبعضهم عادي
دفنوه و تبكبكوا شوي
و آخر الليل سكارى ~

عادي طاح الحطب والحياة حلوه ~

المشهد السابع
سيارة مسرعة ~
و تدعس لها واحد
مسكين هندي
و العسكري صديق الطايش ~
والخطأ نصه على الهندي
والباقي على أبو الطايش
و في الليل ، الطايش يلعب بلوت

عادي طاح الحطب والحياة حلوه ~

المشهد الثامن
قارورة مويه ~
ما تضره !! طايحة في السيارة
يناظرها بغضب ، زعلان منها ~
و يفتح الشباك و رماها وسط الطريق
واذا اجتمع مع الشباب قال :
متى بنتحضر؟!

عادي طاح الحطب والحياة حلوه ~

المشهد التاسع
اهم شي الثوب نظيف ، و الشماغ مكوي
و القلم ماركة ، والساعة تضوي ~
و الجزمة جلد والسيارة عجب ..
و تلفونه ما يسكت
إما بنات
أو البنوك تبي فلوسها ~

عادي طاح الحطب والحياة حلوه ~

المشهد الأخير
سطحية ، و مغرورة
غبية ، و متكبرة و يا ريتها حلوة
تبي زوج مواصفات ~
ما يقول لا !! ويكره الاستراحات
لازم وسيم ، وأنيق ، و متعلم و دخله ممتاز
و يحب السفر ~
و بعد سنين ، تلاقي نفسها في الإنترنت
تدور واحد يقبل بها

عادي طاح الحطب والحياة حلوه ~

.
.
.
.
.
.
.
.

عادي / طاح الحطب والحياة حلوه !

هذيِ حالنــآ و هذي الدنيــآ .. !

●● ممـا راق لي جدآً ..